Замрзнувањето на истражувањата во нуклеарната област на подолг временски период е неприфатливо за Иран, изјави вчера иранскиот верски врховен лидер ајатолахот Али Хамнеи, јави ТАСС.
Тој говореше синоќа на средбата со претседателот Хасан Рохани и министрите во Владата, посветена на текот на преговорите меѓу Техеран и шестте светски сили за иднината на иранската нуклеарна програма.
Хамнеи нагласи дека сите санкции против Иран треба да бидат укинати веднаш, откако ќе биде потпишана спогодба за нуклеарната програма, а нивното укинување не треба да биде поврзано со инспекциите на Меѓународната атомска агенција (МААЕ).
– Прашањето за давање дозвола на инспекторите за пристап до нашите воени објекти не е предмет на расправа. Тоа прашање за нас е црвената линија, која ние нема да ја поминеме, додаде тој.
Според него САД сакаат целосно да ја рзазурнат нуклеарната индустрија на Иран.
Иран и шесторската се обидуваат да постигнат конечна спогодба за нуклеарните активности на Техеран до 30 јуни.