Велика Британија ги пресретнувала телефонските повици и ги следела компјутерите, користени од официјалните претставници на две меѓународни финансиски средби на високо ниво во Лондон во 2009 година, соопшти весникот „Гардиан“.
Весникот тврди дека некои делегати од земјите од Г-20 – дваесетте најразвиени држави во светот, ги користеле интернет кафулињата што ги опремиле британските разузнавачки служби, така што им ги читале мејловите.
Информацијата беше објавена неколку часа пред лидерите на земјите од Г-8, кои влегуваат исто така во Г-20, да ја почнат дводневната средба во Северна Ирска.
„Гардиан“ прецизира дека видел тајни документи, во кои детално се опишувало како британското разузнавање тајно ги следело учесниците на средбата на врвот на Г-20 и на средбата на министрите за финансии во 2009 година.
Шпионската операција била одобрена од високо позициониран службеник во владата на поранешниот премиер Гордон Браун, додава весникот.
Меѓу целите на набљудувањето биле Јужна Африка и Турција. Портпарол на британското Министерство за надворешни работи не сакал да ги коментира тврдењата на весникот.