Претседателката на Европската Комисија, Урсула фон дер Лајен, денес изјави дека само обединета и повторно обединета Европа може да биде независна Европа, дека поголема и посилна Унија е гаранција за безбедноста на сите и дека иднината на Западен Балкан, Украина, Молдавија лежи во ЕУ.
Во својот годишен „Говор до нацијата“ пред Европскиот парламент, таа повика да се постигне следното обединување на Европа.
„Кога зборуваме за независност, зборуваме за избор на нашата судбина. Тоа е она за што се бори Украина. И тоа е она што го заслужуваат сите Европејци. Бидејќи Европа е идеја – идеја за слобода и заемна сила. Тоа беше идејата што ја водеше генерацијата по 1989 година, кога Истокот и Западот се обединија. Таа е исто толку моќна сега како што беше и тогаш. Затоа ги доближуваме идните земји-членки до нашата Унија. Мора да го одржиме темпото на овој процес базиран на заслуги“, рече Фон дер Лајен.