Пазарот на сончогледово масло во ЕУ е стабилизиран во последните недели бидејќи производителите се приспособија на намалените залихи од Украина, а некои пратки сè уште пристигнуваат со железница и камиони, соопшти денеска Европската асоцијација на производители ФЕДИОЛ.
Украина е најголемиот снабдувач на сончогледово масло во ЕУ, но Европејците почнаа да акумулираат залихи поради руската инвазија, што доведе до недостиг низ синџирот на снабдување и зголемување на цените.
Меѓутоа, во исто време, пратки со семки од сончоглед и сончогледово масло почнаа да пристигнуваат од Украина, главно со железница и камиони, се вели во извештајот.
„Волуменот нема да ги достигне пратките кои пред почетокот на војната беа испраќани со бродови, но ја подобрува состојбата на пазарот и им помага на фабриките да ја задоволат побарувачката за сончогледово масло во ЕУ“, се вели во извештајот.
Официјалните бројки на ЕУ објавени во вторникот покажуваат дека помеѓу 27 февруари и 1 мај, 260.000 тони сончогледово масло биле увезени од Украина. Обично се увезуваат околу 200.000 тони месечно, соопшти ФЕДИОЛ на почетокот на март.
Подобрената понуда ги намали цените, а маслото од репка повеќе не се користи како замена, објаснуваат од здружението.
Оттаму напоменуваат дека „флашираното сончогледово масло денес е достапно во ЕУ поради што причината за празните полици во некои супермаркети треба да се бара на друго место“.
Извор: МИА