Според престижниот магазин „Форин полиси“, неколку европски дипломати изразиле незадоволство од стилот на комуникација на новата шефица на европската дипломатија, Каја Калас, оценувајќи дека таа е премногу отворена и недоволно дипломатска во своите говори.
Според публикацијата, некои функционери веруваат дека Калас се однесува „повеќе како полицаец отколку како дипломат“ во своите говори и јавни настапи и дека нејзината работа е речиси исклучиво фокусирана на цврста политика кон Русија.
Анонимни извори од европските институции истакнуваат дека таков пристап веќе предизвикал тензии со администрацијата на американскиот претседател Доналд Трамп, како и непријатност во односите со влијателни земји како Индија и Кина.
„Форин полиси“ наведува дека во Брисел се очекува Калас да усвои „порезервиран и дипломатски тон“ во наредните месеци, со цел да се избегне понатамошно затегнување на односите со клучните партнери надвор од Европа.
