Пратеничката во Европскиот парламент од редовите на владејачката Европска народна партија (ЕПП), Маријана Петир, од утре до сабота, во Битола ќе учествува на Четвртата светска конференција за религиски и меѓуцивилизациски дијалог, јави дописникот на МИА од Брисел.
На конференцијата европратеничката Петир како панелист ќе учествува на панел-дискусијата „Семејство – основен избор и место за човеково достоинство и раст во верата“.
Во својство на претседател на неформалната група „Пријатели на Македонија“ во Европскиот парламент, хрватската политичарка за време на својата тридневна посета на Република Македонија ќе оствари и билатерални средби со македонскиот претседател Ѓорге Иванов, со шефот на македонската дипломатија Никола Попоски, како и со потпретседателот на Собранието на Република Македонија, Антонио Милошоски и со пратениците Лилјана Кузмановска и Зоран Илиоски.
Според канцеларијата на Маријана Петир, таа при посетата на македонската држава ќе се сретне и со Федерацијата на фармери на Македонија, а ќе одржи и работен појадок со претставници на центарот „Лидија – срце што чука“, прв и единствен центар за бременост во Македонија, кој нуди финансиска помош и советување на жените што се подложени на неочекувана бременост.
Како претставник на сите Хрвати и хрватските државјани во Европскиот парламент, вклучувајќи ја и хрватската дијаспора, европратеничката Петир е планирано да ја искористи својата работна посета на Македонија и за да организира средба со Сојузот на Хрватите во Република Македонија.