Бурата низ Европа сè уште предизвикува откажувања на возови и летови во Холандија, сообраќај на камиони во Франција и фериботови во Грција, додека во Велика Британија е на сила жолто предупредување за снег, како и ризик од обилни дождови, силни ветрови и поплави, според извештаите на медиумите.
Денес на аеродромот Шипхол во Амстердам беа откажани четири дојдовни летови, а четири беа одложени, многу подобра ситуација во споредба со стотиците летови што се откажуваа дневно во претходните денови, објавува NL Times. Железничкиот сообраќај во Холандија е исто така засегнат – пријавени се доцнења на неколку линии, додека сообраќајот помеѓу Мастрихт и Лиеж е прекинат до утре вечер. Снег се очекува во Холандија денес, прво во северните, централните и источните покраини, пред постепено да се претвори во дожд.
Од вчера, околу 700 возачи на камиони се заглавени на автопатот А36 во североисточна Франција, кон германската граница, и на RN57 во департманите Дуб и Жиронд, бидејќи снежните врнежи што го погодија источниот дел од земјата ја принудија префектурата да забрани возила над 3,5 тони до утре, објави телевизијата BFM.
Во текот на ноќта, на автопатот А36 работеа само машини за чистење снег, а возила на Црвениот крст со залихи од храна пристигнаа за да им помогнат на возачите на камиони да ја поминат ноќта.
Фериботите во Грција постепено го продолжуваат сообраќајот денес откако силните ветрови се намалија доволно за да се овозможи заминување, соопштија грчките власти, нагласувајќи дека се очекува подобрувањето на условите да биде краткотрајно. Повеќето фериботски линии го продолжија нормалниот сообраќај, а повеќето пловат од пристаништето Пиреја, објави Катимерини. Службениците и операторите на фериботи ги повикаа патниците да ги проверат возните редови пред да патуваат, истакнувајќи дека компаниите сè уште можат да откажат одредени рути по кратко време поради брзо менување на временските услови.
Се очекуваат снежни врнежи во планинските и северните области, а некои пониски региони во северна Грција се исто така изложени на ризик, додека се предвидува нагло опаѓање на температурите, особено на северот од земјата. Во исто време, жолтото предупредување за снег, силни ветрови, мраз, обилни дождови и поплави е на сила во многу делови од Велика Британија, објави Скај њуз.
Жолтото предупредување се однесува на централна и североисточна Шкотска, протегајќи се низ областа северно од Глазгов до Абердин и ќе биде на сила до 14 часот денес.
Според прогнозата, денес во Велика Британија се можни „обилни дождови, силни ветрови и снег“, но се очекуваат поблаги температури во споредба со претходниот период, иако постои и „зголемен ризик од обилни дождови, силни ветрови, снег првично, кој потоа ќе се стопи и ќе доведе до ризик од поплави“.
Откако неколку дена беше погодена од зимската бура Ели, ситуацијата во Германија денес се подобрува – метеоролошката служба ги укина сите постоечки предупредувања за сериозни врнежи во големи делови од земјата, објавува „Билд“.
До синоќа, снежните врнежи во Германија предизвикуваа откажувања на возови, лизгање на автомобили и опасен мраз.