Европската унија ќе воведе контра-царини на стоки од САД во вредност од 26 милијарди евра или 28 милијарди долари, почнувајќи од април, како одговор на американските царини за челик и алуминиум, објави денеска Европската Комисија.
Комисијата соопшти дека од 1 април ќе ја укине сегашната суспензија на царините за американските производи и дека до средината на април ќе биде претставен нов пакет контрамерки против американските стоки, објави Ројтерс.
„Нашите контрамерки ќе бидат воведени во два чекора, почнувајќи од 1-ви април, а целосно ќе бидат во сила од 13-ти април. Подготвени сме да се вклучиме во дијалог. Го задолжив комесарот за трговија Марош Шефчович да ги продолжи преговорите и да истражува подобри решенија со САД“, рече претседателката на Европската комисија, Урсула фон дер Лајен.