Министрите за внатрешни работи на земјите-членки на ЕУ денеска одржуват стедба во Рига, посветана на финализирањето на „конкретниот и амбициозен“ план за борба против пропагандата на радикалните исламисти и на начините за спречување нови напади во Европа.
– Итно е, изјави белгискиот министер за внатрешни работи Јан Жамбон по пристигнувањето на средбата.
Министрите разгледуваат конкретни мерки, како што се системска проверка на граѓаните на ЕУ при влез и излез од Шенген зоната, создавање европски регистар, кој ќе вклучува податоци за патниците во воздушен транспорт, обезбедување технологија за набљудување на контактите на социјалните мрежи и дешифрирање на некои пораки, со цел да се направат напори за надминување на факторите кои водат до радикализирање на муслиманите во Европа, да се спречи нивно заминување во конфликтните зони и да се следат по нивното враќање во Европа.
– ЕУ треба да преземе заеднички напори и земјите-членки повеќе да не дејствуваат одделно како досега. Очекувам да бидат усвоени конкретни и амбициозни предлози на средбата на лидерите на држави и влади на 12 февруари во Брисел, нагласи координаторот на ЕУ за борба против тероризмот, Жил де Керхов.
Над 3.000 радикални Европејци им се приклучиле на терористички исламистички движења во Сирија и Ирак, а околу 30 отсто од нив се вратиле во Европа, покажуваат податоците на земјите-членки на Унијата.