Американскиот сенатор Џон Мекејн и поранешниот шведски премиер Карл Билд, се именувани за членови на Меѓународниот консултативен совет на Украина, изјави во Киев претставник на кабинетот на украинскиот претседател Петро Порошенко.
Овие двајца политичари се меѓу неколкумината странци, кои се назначени за да бидат надворешни советници во консултативниот совет, што е создаден со посебен декрет на Порошенко.
Украинските власти одлучија да се формира еден ваков совет, за да помогне во спроведувањето на неопходните реформи во оваа земја, погодена со судирањата во Источна Украина.
Републиканскиот сенатор од САД, Мекејн е еден од најсилните подржувачи во Вашингтон, за испраќање американско оружје за да им се помогне на прозападните власти во Киев, против „руската агресија“.
Покрај, Мекејн, кој беше и претседателски кандидат за американските избори во 2008 година, како и познатиот шведски политичар Билд, меѓу странските советници е именуван и поранешниот претседател на Грузија, Михаил Саакашвили. Двајцата важат за остри критичари на политиката на Русија кон Украина.
– Сите овие луѓе имаат големо искуство во спроведување реформи во своите земји, изјави Дмитри Шимкин, претставник на кабинетот на украинскиот претседател.
Шимкин додаде дека новоформираниот Меѓународен консултативен совет, набргу ќе ја одржи својата прва седница.