Долниот дом на полскиот Парламент го усвои денеска спорниот закон за рефомирање на Врховниот суд.
Законот беше доставен од владејачката партија „Право и правда“. Тој треба да биде гласан и во Горниот дом на Парламентот.
Законот го поддржале 235 пратеници, 192 се изјасниле „против“, додека 23 биле воздржани.
Според полската опозиција законот ќе ја поткопа независноста на судската власт и демократијата во земјата.
Законот им дава контрола на политичарите, а не на судиите, врз највисоките судски инстанци на Полска. Претседателот ќе има надлежност да влијае врз работата на Врховниот суд и да назначува негови членови. Се предвидува разрешување од должноста на досегашните врховни судии, освен оние, кои се избрани од претседателот.
Новиот закон предизвика критики од страна на ЕУ и протести на улиците на Полска. Европската комисија вчера ја повика земјата да ги запре реформите на судскиот систем, упатувајќи закана за санкции без преседан.