Данската медиумска групација „ЈП/Политикен Хус“, чиј весник „Јоландс постен“ објави во 2005 година карикатури на пророкот Мухамед, ги зголеми мерките за безбедност на своите објекти, откако претходно денеска беше извршен терористички напад врз редакцијата на францускиот сатиричен неделник „Шарли ебдо“, во кој беа убиени 12 лица, а ранети беа десетици.
Данскиот карикатурист Курт Вестергор, автор на каркатурите во „Јоландс постен“ изјави денеска дека е потресен и шокиран од нападот врз францускиот медиум, кој исто така објавуваше карикатури, јави ДПА.
Тој нагласи дека задача на политичкиот карикатурист е да ги „држи на око сите авторитарни сили“ и нагласи дека и тој самиот има слична судбина со „Шарли ебдо“.
Карикатурите на Вестергор предизивкаа масовни протести во исламскиот свет и тој самиот беше цел на неколку неуспешни атентати, а во моментов е под полициска заштита.