Данска пратеничка од антиимиграциска партија ги повика мажите од државата да претпочитаат услуги од дански проститутки за да придонесат за борбата против трговијата со луѓе.
– Мислам дека треба да се обидеме да ставиме крај на трговијата со луѓе и тоа значи дека подобро нашите мажи да не посетуваат странски проститутки, нагласи Пија Аделстен од Данската народна партија.
Изјавата ја даде по анкета во која се вели дека секој седми Данец смета дека е прифатливо да се користат услуги на проститутка која била жртва на трговија со луѓе. Данската пратеничка нагласи дека нема ништо против мажите и жените кои плаќаат за сексуални услуги.
Данска е единствената скандинавска држава каде е легализирана проституцијата. Според податоци од социјалните служби, од 2010 година, половината од проститутките во Данска се од странство – 900 од Тајланд, 1000 од Централна и Источна Европа, 300 од Африка.