Поплавите во Јужна Франција однесоа четири жртви, меѓу кои мајка и син, а судбината на уште едно дете не е позната.
Во јужниот департман Гар мајка и нејзиниот четиригодишен син се удавиле, откако автомобилот им бил однесен од надојдените води. Другото дете во автомобилот – едногодишно бебе е во неизвесност, и според спасувачите, шансите да биде пронајдено живо се мали.
Автомобилот паднал од осум метри височина од мост, што бил поплавен од најдојдена река. Во него се наоѓал и таткото, кој е примен во болница во состојба на шок.
Друго возило е однесено од водите во слични околности. Во него било пронајдено телото на 50-годишен маж, на 150 метри од поплавен мост.
Синоќа загина и еден пензионер, чиј автомобил паднал во бездна.
Есенва југоисточниот дел на Франција, најмногу департманите Гар и Еро, беа повеќепати подложени на бури со поројни дождови, кои според експерти се предизвикани од невообичаено високите температури на Средоземното Море.