Чешката полиција предизвика многубројни критики и реакции на социјалните мрежи заради воведувањето на најновата мерка на обележување на бегалците со бројки, јави дописникот на МИА од Прага.
Видеата и фотографиите кои ги објавија странските медиуми, а на кои се гледа како полицијата ги симнува од воз бегалците и со маркер им пишува бројки на рацете, за што полицијата тврди дека го олеснува регистрирањето на бегалците кои немаат документи, а влегуваат во земјата, многумина го осудија и споредија со практиката на нацистите кон Евреите.
– Тоа е многу сериозна работа. Десетици бегалци беа означени буквално како добиток, кој оди на колење. Несомнено, тоа потсетува на најтемниот период од современата историја, изјавил шефот на Унијата на италијанските еврејски организации.
Според чешкото Министерство за внатрешни работи ,,означувањето е воведено поради големиот број на деца меѓу бегалците и целта е спречување на децата да се изгубат”.
Портпаролката на полицијата во одделот за странци исто така информираше дека на тој начин се идентификуваат цели семејства, се запишува кодот на возот во кој патуваат за да знаат каде да ги вратат во случај повторно да се најдат на чешка територија.