Бројот на загинати во земјотресот со јачина од 6,8 степени според Рихтеровата скала што ја погоди југозападната кинеска провинција Сечуан се искачи на 82, објавија државните медиуми.
Земјотресот кој се случи во понеделникот, најсилниот што ја погоди провинцијата од 2017 година, повреди повеќе од 270 луѓе, а 35 се водат како исчезнати. Властите повторно ги отворија патиштата до епицентарот на земјотресот во Лудинг. Афтершок со јачина од 2,9 степени го потресе градот доцна синоќа, објавија државните медиуми.
Синоптичарите издадоа портокалово предупредување, второ највисоко, за можни геолошки катастрофи во Лудинг, кои може да вклучуваат лизгање на теренот. Помалку сериозно жолто предупредување е издадено за централниот и западниот дел на Сечуан.
Особено тешко погодени се провинцијата Сечуан и областа Лудинг, особено префектурата Ганзи, каде што живеат претежно Тибетанци, и Шимијан во близина на градот Јаан. Областа е околу два часа со автомобил југозападно од главниот град на провинцијата Ченгду.
Провинцијата Сечуан е особено ранлива на земјотреси
Голема спасувачка операција во која учествуваат илјадници луѓе трае со денови, а мобилизирана е и армијата. Илјадници куќи беа уништени или оштетени. Земјотресот предизвика и лизгање на земјиштето што ги блокираше улиците.
Провинцијата Сечуан, која се наоѓа на работ на индиската континентална плоча и евроазиската плоча, е особено чувствителна на земјотреси. Во 2008 година, областа беше погодена од земјотрес со јачина од 7,9 степени според Рихтеровата скала во кој загинаа повеќе од 80.000 луѓе.