Шкотските пратеници гласаа денеска да му се овозможи на првиот министер Никола Старџен да поднесе официјално барање до британската Влада за одржување нов референдум за независност на Шкотска.
За поднесување на барањето за одржување нов референдум гласаа 69 пратеници, додека 59 беа против.
За организирање референдум е потребно одобрение од британската Влада.
Најновите анкети покажуваат поддршка за независност на Шкотска од 46 отсто испитаници, што е најмногу од 1999 година откако се спроведува такви анкети.
Од друга страна, британската Влада соопшти дека нема да влезе во преговори за предлогот на шкотската Влада за нов референдум за независност.
– Би било неправедно кон народот во Шкотска да се бара од нив да донесат клучна одлука без неопходни информации за нашиот иден однос со Европа или за тоа како би изгледала независна Шкотска, се вели во соопштение од британската Влада.
Британската премиерка Тереза Меј најави денеска дека утре ќе го активира Членот 50 од Лисабонскиот договор со кој се покренува процес за излез на Британија од Европската унија по 44 години членство и да се почнат преговори кои се очекуваат да траат две години.
Старџен изјави минатата година дека Шкотска е принудена да ја напушти ЕУ против својата волја.