Велика Британија ги отфрли тврдењата на рускиот претседател Владимир Путин дека само мал дел од житото што се извезува од Украина оди во сиромашните земји.
Путин пред неколку дена рече дека само 2 од 87 бродови кои извезле околу 60.000 тони жито од Украина отишле во сиромашните земји.
Британското Министерство за одбрана ги наведе бројките на ОН кои покажуваат дека околу 30 отсто од житото извезено според договорот, склучен со посредство на ОН и Турција за извоз од украинските пристаништа, било испорачано во земјите со низок и среден приход во Африка, Блискиот Исток и Азија.
„Русија спроведува насочена стратегија за дезинформации за да се обиде да ја префрли вината за проблемите со несигурноста на храната, да ја дискредитира Украина и да го минимизира противењето на нејзината инвазија“, се вели во дневниот разузнавачки билтен за Украина кое британското министерство го објавува на Твитер.
Извор: МИА