Бразилската федерална полиција денеска соопшти дека не се точни информациите дека телата на британскиот новинар Дом Филипс и староседелецот експерт Бруно Переира се пронајдени во амазонската џунгла.
Во соопштението на полицијата се наведува дека досега е пронајден само биолошки материјал и предмети од исчезнатите, како што претходно беше најавено, пренесуваат британските медиуми.
Претходно бразилскиот портал G1, повикувајќи се на сопругата на Филипс, објави дека денеска се пронајдени телата на Филипс и Переира, кои исчезнаа пред повеќе од една недела во џунглата.
Во неделата беше пронајдена облека на Переира, со лична карта на негово име, како и ранец со облека на Филипс и чизмите на двајцата мажи.
Очевидци изјавија дека ги виделе двајцата како патуваат по реката на 5 јуни.
Двајцата мажи тргнале на новинарска задача во оддалечената област на џунглата, на границата на Бразил со Перу и Колумбија, каде што се наоѓаат повеќето нерегистрирани членови на домородни племиња. На тој простор има банди кои шверцуваат кокаин, а е полн со шумокрадци и ловокрадци, како и диви копачи на руда.
Извор: МИА