Европска Унија е подготвена да претстави „целосен пакет санкции“ за Русија „штом ќе биде потребно“, изјави денеска високиот претставник на ЕУ за надворешна политика и безбедност, Жозеп Борел.
– Веќе подготвивме целосен пакет санкции. Работевме на тоа и бев во контакт со САД и со сите партнерски земји, со техничка поддршка на Европската комисија, посочи Борел.
Тој говорејќи на неформалниот состанок на земјите-членки на Европскиот совет, на кој ќе се разговара за руско-украинската криза, повтори дека ЕУ „се уште верува во дипломатскиот процес“ и оти ќе ги концентрира напорите на дипломатијата, но предупреди дека ЕУ „ќе дејствува решително“ доколку потребно.
– Ако има агресија, веднаш ќе го повикам Советот за надворешни работи да предложи пакет санкции и сигурен сум дека, иако е потребна едногласност, Советот ќе ги одобри. Кога ќе дојде моментот одлучно ќе дејствуваме одлучно, посочи Борел.
Извор: МИА