Американскиот претседател Барак Обама со одлуката да побара од американскиот Конгрес одобрение за воена акција во Сирија, влегува во најголемиот коцкарски ризик од почетокот на својот мандат, оцени денеска Би-Би-Си.
Уредникот на британскиот јавен сервис за Северна Америка, Марк Мардел наведува дека потегот на Обама да го одложи донесување на одлука и да побара одобрение од Конгресот „очигледно шокирал многумина од неговите блиски соработници“.
Победата, се вели во текстот, е осигурана во Претставничкиот дом на Конгресот, кој го контролираат републиканците, а кои се заговорници на нападот врз Сирија.
– Можеби не е толку сигурна во Сенатот, тоа ќе биде слободно гласање и нема да има формални обиди на партиските лидери да влијаат врз своите колеги, наведува уредникот на Би-Би-Си.
Иако конгресмените во Капитол хил беа детално известени за безбедносните информации поврзани со наводниот хемиски напад во предградието на Дамаск на 21 август, неколкумина сенатори и конгресмени и натаму не се уверени во оправданоста на интервенцијата.
Најмалку двајца сенатори, еден републиканец и еден демократ, сметаат дека нацрт-резолуцијата на Белата куќа, во која се бара одобрение да се „стопира, спречи и намали“ способноста на сириските власти да употребат хемиско оружје, остава премногу отворени можности за начинот на кој треба да се изврши нападот.
– Доколку Обама не ја добие поддршката од Конгресот, тоа ќе претставувува катастрофа за американскиот претседател, смета Мардел.