Белгија заостанува во подготовките кои се „клучни за да се минимизира ризикот за втор бран“ на коронавирусот, се вели, меѓу другото, во препораките кои и биле дадени на Владата пред минатонеделниот состанок, а објавени вчера.
Белгија од вчера влезе во третата фаза од својата стратегија за излез од пандемијата, и повторно ги отвори баровите и ресторани и им дозволи на сите да имаат близок контакт со 10 други луѓе неделно. Стратегијата вклучува ограничување на нови жаришта си тестирање и пронаоѓање на сите што можеби се заразени, и управување со „појава на кластери“ кога е потребно.
Но, во извештајот, доставен пред белгиската Влада да ги објави своите планови на 3 јуни, Групата експерти за стратегија за излез (ГЕЕС) предупреди дека „овие две линии на одбрана сè уште бараат постојано силно внимание и акција на владата“.
Подобрувањето на тестирањето и потрагата по контакти е бавно, а планот за дејствување доколку вирусот се врати „сè уште е во многу концептуална фаза“, напишале експертите. „Покрај тоа, треба дополнително да се подготви акционен план за да се утврдат мерки во случај да дојде до втор бран“.
До 3 јуни не биле спроведени многу од препорачаните мерки за да се спречи враќање на вирусот, истакнуваат експертите во нивниот извештај. Тоа вклучува зголемување на бројот на здравствени работници и мобилизирање на ресурсите. Покрај тоа, Владата сè уште нема објавено едноставни и јасни препораки за справување со епидемијата во училиштата или продавниците.