Украинците одредуваат кој ќе управува со Украина, соопшти Белата куќа, откако рускиот претседател Владимир Путин предложи формирање привремена администрација во Украина.
Управувањето со Украина го одредува нејзиниот Устав и волјата на народот на земјата, изјави вчера портпаролот на Советот за национална безбедност на Белата куќа, запрашан да ја коментира изјавата на претседателот Путин, пренесува Ројтерс.
Од Украина се уште нема коментар во врска со изјавата на Путин, пренесува агенцијата.
Путин вчера рече дека има причина да се верува дека руските трупи „ќе ги завршат украинските вооружени сили“.
Тој оцени и дека воведувањето на привремена администрација во Украина ќе овозможи одржување „демократски избори и доведување на легитимна влада на власт“, со која потоа ќе може да се преговара за мир, пренесува Танјуг.
Зборувајќи за можностите за решавање на конфликтот во Украина, Путин потсети дека практиката на надворешно управување или привремена администрација постојано се користи во рамките на мировните активности на ОН, на пример, во Источен Тимор, Нова Гвинеја и некои делови од поранешна Југославија.
Според него, бидејќи минатата година немало претседателски избори во Украина, цивилните власти во земјата сега се нелегални.