Генералниот секретар на ОН Бан Ки-мун синоќа повика Северна Кореја да ги „намали тензиите“ во алармантната ситуација, оценувајќи дека секаква грешка во проценката во таа криза може да има „многу сериозни последици“.
– Нуклеарна закана не е игра, ова е многу сериозно. Јас мислам дека отишле премногу далеку со својата реторика и загрижен сум заради фактот што секоја грешка во оцена на ситуацијата може да предизвика криза со сериозни последици, изјави Бан на прес конференција во Мадрид.
Северна Кореја транспортираше втора ракета со среден дострел на источното крајбрежје и ја инсталира на мобилна лансирна рампа, јави Би-Би-Си повикувајќи се на јужнокорејски владин извор.
Министерството за одбрана во Сеул вчера потврди за поставена прва севернокорејска ракета на источното крајбрежје во државата, но засега нема коментар за информациите за втората ракета.
Јужнокорејскиот министер за одбрана Кин Кван-Јин изјави дека ракетата може да достигне „значајна далечина“, но не и американско копно.
Северна Кореја поттикната од нови санкции на ОН и воени вежби на Јужна Кореја и САД, упати низа закани за можна нуклеарна војна. Севернокорејската армија вчера соопшти дека добила конечно одобрение за воена акција против САД.
– Моментот на експлозија брзо се приближува, соошти Генералштабот на севернокорејската армија.