Американските власти располагаат со 400 страници од одамна загубениот дневник на Алфред Розенберг, блиско лице на Адолф Хитлер, што има централна улога во убиството на милиони Евреи и други луѓе за време на Втората светска војна.
Според првичните оценки на американските власти дневникот може да фрли ново светло врз средбите на Розенберг со Хитлер и други нацистички лидери, вклучително Хајнрих Химлер и Херман Геринг.
Документот содржи детали за германската окупација на СССР, вклучително плановите за масовно убиство на Евреи и Источноевропејци. Дневникот содржи детали и за односите во редовите на високата германска команда, особено за кризата предизвикана од бегството во Велика Британија на Рудолф Хес во 1941 година. Во дневикот се наведени и податоци за голем број кражби на уметнички дела низ цела Европа.
Розенберг беше осуден во Нирнберг и обесен во 1946 година за злосторства против човештвото. Тој беше влијателен нацистички идеолог, особено во однос на расизмот.
Розенберг раководеше со партискиот оддел за надворешна политика и емитуваше нацистички дневен весник. Розенберг, исто така, бил раководител и на кражбите на културно и црковно богатство низ цел Европа.
Обвинителот од Нирнберг Роберт Кемпнер долго време бил осомничен од американските власти дека тајно го внел дневникот во САД.
Кемпнер е роден во Германија и избегал во 30-тите години од нацистите во САД. По војната се враќа во татковината како судија.
Во своите мемоари Кемпнер цитира неколку делови од дневникот на Розенберг.