Администрацијата на американскиот претседател Доналд Трамп соопшти дека до јануари следната година ќе ја продолжи хуманитарната програма, што на околу 58.000 Хаиќани ќе им овозможи да останат да живеат во САД.
Во прашање се жители на Хаити, кои во САД дошле по разурнувачкиот земјотрес од 2010 година.
Како што наведуваат американските медиуми, од администрацијата се навестува дека веќе нема да има натамошно продолжување на програмата.
Американскиот секретар за внатрешна безбедност, Џон Кели, изјави дека од земјотресот до сега условите на Хаити значително се подобрени.
Кели додаде дека се уште не е донесена конечната одлука за оваа програма и дека таа се очекува кон крајот на годината.
Хаиќаните, меѓутоа, истакнуваат дека условите таму и натаму се лоши.
Во земјотресот со јачина од 7 степени според Рихтер, што Хаити го погоди на 12 јануари 2010 година, загинаа неколку десетици илјади лица, додека повеќе од милион ги напуштија своите домови.