Американската војска оваа недела префрлила околу 90 моќни ракети за противвоздушна одбрана „Патриот“ од складиште во Израел во Полска за испорака во Украина, потврдија за „Аксиос“ три извори запознаени со операцијата.
Испораката на повеќе ракети „Патриот“ во Украина беше главен приоритет на Пентагон за да му помогне на Киев да се одбрани од руските напади врз неговата критична инфраструктура. Ракетите „Патриот“ се сметаат за меѓу најдобрите во светот за воздушна одбрана.
Ова е воедно и најзначајната испорака на оружје од Израел за Украина од руската инвазија пред речиси три години.
Да потсетиме, минатиот април израелските воздухопловни сили официјално го деактивираа системот за противвоздушна одбрана Патриот, повеќе од 30 години откако првпат му беше даден на Израел за време на Првата Заливска војна.