Партијата АКП на турскиот претседател Таип Ердоган води на изборите во недела во 10 од 11-те провинции погодени од земјотресите во февруари, а аналитичарите велат дека неговото ветување за обнова на разурнатите градови ги смири гласачите во местата кои се главно упоришта на АКП. Силното прикажување на владејачката партија, и покрај првичните очекувања во февруари дека земјотресите ќе и наштетат на поддршката, беше поттикнато и од сомнежите за способноста на опозицијата да ги исполни очекувањата на гласачите.
Низ целата земја, АКП со исламистички корени освои ново парламентарно мнозинство во сојуз со своите партнери, при што Ердоган (69) води на претседателските избори пред вториот круг на 28 мај со неговиот главен ривал.
Во силните земјотреси на 6 февруари загинаа повеќе од 50.000 луѓе, а милиони останаа без покрив над главата во Турција. И покрај големиот број загинати и повредени и масовната миграција што следеше, одѕивот на гласачите остана многу висок во регионот, помеѓу 85-89 проценти во повеќето од 11-те провинции и над 80 проценти во другите. Републичкиот просек беше 88,9 отсто. Многу Турци кои избегаа од регионот се вратија на избори.
Курдските гласачи во регионот силно го поддржаа главниот ривал на Ердоган, Кемал Киличдароглу во претседателската трка, но претседателот сепак победи на гласањето во осумте погодени провинции. Анкетарот Мехмет Али Кулат рече дека опозицискиот сојуз не успеал да придобие доволно гласачи.
„Преживеаните од земјотресот сериозно ја критикуваа реакцијата на владата на анкетите и велеа дека нема да гласаат за нив, вели Кулат.
– Тие веруваат дека Ердоган е тој што може да го направи тоа. Тоа е еден од најважните фактори – додава тој.