Дипломати од Израел, од САД и од Русија на почетокот од јули имаа тајни преговори за прекин на огнот и за определување на зони на деескалација во јужниот дел од Сирија, објави денеска израелскиот весник „Арец“.
Весникот повикувајќи се на неименувани извори од израелското Министерство за надвореши работи, како и на дипломати од западните држави, наведува дека дипломатите трипати се сретнале во главниот град на Јордан, Аман и во една европски град.
„Арец“ посочува дека израелските дипломати категорично биле против Договорот за зоните за деескалација бидејќи претставниците на Москва и на Вашингтон не обрнувале внимание на растечкото влијание на Иран во регионот. Тие апелирале до Москва и Вашингтон да побараат повлекување на иранските сили, на борците на Хезболах и на шиитските борци лојални на Техеран повлекување од територијата на Сирија.
– Клучна тема на преговорите било барањето на Израел да се зачува Договорот за прекин на огнот на долгорочна основа и да се определи степенот на идното влијание на Иран во Сирија по крајот на граѓанската војна во земјата. Американците и Русите биле фокусирани на елиминирање на Исламска држава и најбрза стабилизација на состојбата. Ерусалим бил загрижен дека Сирија може да стане ракетна база и потенцијална закана за Израел и за Јордан поради Иран, наведува „Арец“.
На преговорите во Аман присуствувале и претставници на Јордан, чиј став бил идентичен со Израел поради стравот од иранската закана.
Весникот потенцира дека преговорите биле неуспешни.