Најмалку 44.374 луѓе загинаа во двата силни земјотреси што ја погодија јужна Турција на 6 февруари, соопшти во денеска официјален претставник на националната агенција за катастрофи.
Земјотресите со јачина од 7,7 и 7,6 степени беа со епицентар во Кахраманмарас и погодија 10 други провинции – Адана, Адијаман, Дијарбакир, Елазиг, Хатај, Газиантеп, Килис, Малатија, Османије и Шанлиурфа. Повеќе од 13 милиони луѓе се погодени од разорните земјотреси.
Неколку земји во регионот, вклучувајќи ги Сирија и Либан, исто така ги почувствуваа силните потреси што ја погодија Турција за помалку од 10 часа.
Јунус Сезер, шеф на Агенцијата за управување со катастрофи и вонредни состојби (АФАД), рече дека работата за пребарување и спасување е завршена во речиси 21.000 згради, додавајќи: „Сега сме целосно фокусирани на отстранување на отпадот“.
Најмалку 9.900 последователни потреси се регистрирани по двата големи земјотреси, рече Сезер.
Повеќе од 230.000 луѓе во моментов работат на терен, додаде тој.
Многу земји испратија спасувачки тимови и помош.
„1.180 луѓе од меѓународните тимови за пребарување и спасување сè уште помагаат во активностите за хуманитарна помош“, рече Сезер.
Хуманитарна помош и шатори беа испратени во регионот со 116 хеликоптери и 78 авиони, додаде тој.
„Просечно дневно испраќаме повеќе од 10.000 шатори во регионите и ги доставуваме до најоддалечените краеви. Во моментов имаме 287 шатори-градови во регионот“, рече Сезер.
Повеќе од 1,5 милиони погодени луѓе се сместени во шатори, градови со контејнери и јавни гостински куќи во областите на катастрофата, рече Сезер, додавајќи дека 563.000 луѓе се евакуирани надвор од зоната на катастрофата.