Лицата кои 14 дена седеле во изолација поради сомнеж за коронавирус не е задолжително да се тестираат ако немаат симптоми. Министерот за здравство Венко Филипче вели дека за ваквите лица се препорачува уште 14 дена да останат во домашна изолација.
„ На Комисијата за заразни болести се дискутираше за времетраењето на самоизолацијата и заеднички стручен став на епидемиолозите е дека после карантинот од 14 дена нема потреба од тест туку 14 дена дополнителна домашна самоизолација. Тоа беше усвоено од страна на стручните лица во Комисијата“, рече министерот Филипче.
Ваквиот став на Комисијата за заразни болести министерот најави дека ќе се официјализира и како известување ќе биде дистрибуиран до сите институции.
Според официјалните податоци на Центарот за управување со кризи во самоизолација има 7.307 лица, со решенија за изолација се 618 лица, а под надзор се 390 лица.
