Претседателката на Европската комисија, Урсула фон дер Лајен, го поздрави „историскиот договор“ за целосна забрана на увозот на руски фосилни горива, велејќи дека целта е приходите на Русија од финансирањето на нејзината војна во Украина да се намалат на нула.
„Денес е навистина историски ден за нашата Унија. Ова е почеток на нова ера, ера на целосна енергетска независност за Европа од Русија“, изјави фон дер Лајен во изјава за медиумите.
Таа истакна дека ЕУ значително ги намалила приходите на Русија од извоз на фосилни горива.
– На почетокот на војната, ѝ плаќавме на Русија 12 милијарди евра месечно за фосилни горива, сега сме на 1,5 милијарди, а тоа е сè уште премногу. Нашата цел е да го намалиме тоа на нула, изјави фон дер Лајен.
Советот на ЕУ и Европскиот парламент постигнаа договор за регулатива со која се воведува правно обврзувачка, фазна забрана за увоз на руски течен природен гас (LNG) и гасовод, со целосна забрана од крајот на 2026 година и есента 2027 година, соодветно.
Договорот постигнат од страна на ко-законодавците доцна во вторник вечерта предвидува забрана за увоз на руски течен гас од 25 април 2026 година за краткорочни договори склучени пред 17 јуни 2025 година и од 17 јуни 2026 година за гас испорачан преку цевковод.
За долгорочни договори за увоз на течен гас, забраната ќе стапи во сила на 1 јануари 2027 година, како што е предвидено во 19-тиот пакет санкции против Русија.
Што се однесува до долгорочните договори за увоз на руски гас преку цевковод, забраната ќе стапи во сила на 30 септември 2027 година, под услов капацитетите за складирање на гас да се доволно исполнети, а најдоцна до 1 ноември 2027 година.