Вицешампионот на Англија Ливерпул со победа од 4:1 над Свонси постигната синоќа ја заврши календарската година.
Ова беше последниот натпревар од 19. коло на Премиер лигата и со овој триумф „црвените“ се пробија на осмото место на табелата и се наоѓаат пред ривалот од синоќа.
Воедно ова беше прв натпревар сезонава Ливерпул да постигне четири голови.
Серијата голови ја почна Алберто Морено во 33.минута што беше и резултат од првиот дел. Адам Лалана во 51.минута донесе водство од 2:0, но веќе во следната Свонси намали преку Гуфи Сигурдсон. Во 61.минута Лалана зголеми на 3:1, а конечните 4:1 со автогол ги постави поранешниот играч на Ливерпул Џонџо Шелви во 69.минута.
Ливерпул со 28 бодови се проби на осмото место, додека Свонси со исто 28 е на деветтото место. Лидер на табелата е Челзи со 46 бодови, пред шампионот Манчестер Сити со 43, а Манчестер Јунајтед има 36.
Премиерлигашите следното коло (прво од вториот дел) го играат веќе задутре (четврток).