Капитенот на Пари Сен Жермен, Тијаго Силва призна дека се уште сака да игра за европски клуб. Скоро е сигурно дека 35-годишниот дефанзивец на францускиот шампион ќе го напушти тимот како слободен агент по крајот на сезоната. Се верува дека тој може да се врати во некој од неговите поранешни екипи – Флуминенсе или Милан.
– Секој знае за мојата приврзаност кон Флуминенсе. Јас страдав од туберкулоза и тие ми ги отворија вратите. Јас секогаш ќе им бидам благодарен за тоа, но сепак имам цели да ги постигнам во Европа. Се надевам дека ќе ги постигнам што е можно поскоро, рече Силва за време на преносот во живо на Инстаграм.
Според „Ил Месаџеро“, ветеранот се надева дека ќе биде дел од Бразил за Светското првенство во 2022 година и затоа сака да остане на Стариот континент.