На Европското кошаркарско првенство 2015 познат е првиот пар за четвртфиналната фаза. Селекцијата на Шпанија вечерва во Лил ја победи Полска убедливо со 80:66 и за противник ја доби Грција која денеска во осминафиналето беше подобра од Белгија со 75:54.
Шпанците на дуелот со Полска влегоа како апсолутни фаворити, а тоа го потврдија во првите десет минути кога поведоа со 25:20. Сепак полските кошаркари резултатски се вратија во втората четвртина и по 19:16 на полувреме се отиде само со два позитива за Шпанија (41:39).
Во второто полувреме Полска во неколку наврати дури беше и во водство, но не издржа па во последната четвртина постигна само 11 поени наспроти 25 на Шпанците.
Вечерва од 21 часот се игра последниот денешен дуел од 1/8финалето меѓу домаќинот Франција и репрезентацијата на Турција.
Победникот од овој дуел за противник ќе ја има Летонија која денеска ја победи Словенија со 73:66.
Другите четири осминафинални натпревари се играат утре:
Хрватска – Чешка,
Србија – Финска,
Израел – Италија,
Литванија – Грузија.