Репрезентацијата на Литванија се избори за полуфинале на Европското кошаркарско првенство, откако синоќа во најнеизвесниот четвртфинален дуел ја победија Италија со 95:85. Победникот беше решен по дополнителни пет минути, бидејќи натпреварот по предвидените 40 минути заврши нерешено 79:79.
Двете репрезентации имаа свои моменти и серија поени, но сепак конечната разлика од десет поени беше највисоката предност во текот на целиот меч.
Во продолжението пресуди цврстата одбрана на Литванците и серијата грешки на италијанскиот состав.
Јонас Валанчијунас со дабл-дабл учинок од 26 поени и 14 скокови беше најдобриот кошаркар во победничката селекција, а кај Италија се истакна Андреа Барњани со 21 поен.
Литванија во полуфиналето утре од 21 часот ќе игра против Србија која вчеравечер ја совлада Чешка.
Вечерва од 21 часот на програмата е првото полуфинале меѓу домаќинот Франција и Шпанија.