Возачот на Лотус, Кими Раиконен изјави дека благодарение на добриот старт, но и тимската стратегија успеа да победи во првата трка на Формула 1, за големата награда во Австралија, во Мелбурн.
-Добро стартував и потоа се одеше како што треба. Направивме добар план и се државме до него. Екипата одработи сјајно и се излезе совршено – изјави Рајконен по победата во Мелбурн.
Лотус се одлучи на две одења во боксот, што излезе како добра тактика, бидејќи неговите противници мораа три пати да одат во бокс.
-Можев да ги сочувам гумите и да возам побргу кога и да сакав. Ова беше најлесната трка во која победив. Се надевам дека уште некој пат ќе се повтори – изјави шампионот на Формула 1 од 2007 година.
Возачот на Ферари, Фернандо Алонсо истакна дека е задоволен со освоенето второ место на „Албер парк“.
-Премногу сум среќен. Минатата година имавме тежок почеток, а ова година сме оптимисти. Повторно ќе бидеме сериозен противник. Не можевме да се бориме денес со Кими, беше премногу брз за нас – изјави Алонсо.
Елена Георгиевска