Швајцарската квалификантка Стефани Фогел ја победи изненадувачки четвртата тенисерка на ВТА листата, Слоун Стивенс со 6:3, 6:0 во натпревар од вториот круг на турнирот во Индијан Велс, додека Серена Вилијамс оствари триумф против Викторија Азаренка во друг натпревар од програмата.
– Тешко се игра со соперничка, против која не си се справила добро во минатото. Денес беше ветровито, но условите беа такви и за двете. Јас едноставно не играв добро, рече Стивенс по крајот на натпреварот.
Вилијамс пак испрати 39 винери во полето на Азаренка и победи со 7:5, 6:3 во реприза на финалето од 2016 година, кога победник беше тенисерката од Белорусија.
– Навистина ја сакам, таа е моја многу добра пријателка. Таа исто така е мајка и поранешна лидерката на светската ВТА листа, каква што сум и јас. Тешко е да се игра против некого со кого сум толку блиска, но исто така е интересно, изјави Вилијамс по натпреварот.
Следната соперничка на Американката ќе биде Гарбине Мугуруса откако Шпанката, бр. 20 во шемата, оствари триумф над Лорен Дејвис со 6:1, 6:3. Џенифер Брејди пак ја совлада Каролина Гарсија со 6:3, 3:6, 6:0 и се пласираше во третото коло, каде ќе се сретне со Аш Барт. Таа ја отстрани Татјана Марија со 6:4, 6:4.
Чехињата Маркета Вондрушова ја победи со 6:2, 6:1 Дарија Касаткина, по што минатогодишната финалистка најверојатно ќе го загуби своето место во топ 20 на женската листа.
Поставената под број 2, Симона Халеп, Елена Остапенко, Џоана Конта, Елизе Мертенс и 18-годишната Бјанка Андреску исто така се пласираа во третиот круг.