Бразилскиот фудбалски стручњак Карлос Алберто Переира смета дека е дојдено времето да се стави крај на шпанската доминација во светскиот фудбал, а на своите сонародници пред утрешното финале во Купот на конфедерации им предложи да не ја менуваат тактиката.
– На селекторот Сколари му сугерирав и против Шпанија да игра напаѓачки фудбал. Бразил е домаќин и мора да наметне иницијатива. Таквиот фудбал донесе резултат. Бразил во последните неколку месеци играше против пет поранешни светски шампиони и ниту еднаш не изгуби, истакна Переира.
Финалето на Купот на конфедерациите меѓу домашниот Бразил и актуелниот светски и европски првак Шпанија ќе се одигра на „Маракана“ во Рио де Жанеиро утревечер точно на полноќ.
Претходно од 18 часот во дуел за третото место ќе играат Уругвај и Италија.