Македонската традиционална карате федерација викендов со низа активности ќе одбележи 50 години традиционално карате во Македонија, во соработка со Агенцијата за млади и спорт.
Во Будо карате центарот „Недеви” утре и задутре од 11 до 13 часот ќе се одржи тренинг академија со др. Владимир и Илија Јорга, а утре во 13 часот на Универзитетот за туризам и менаџмент ќе биде промовирана монографијата „Половина век исполнет со успеси”. За здутре во 19 часот во Музејот на Македонската револуционарна борба организаторите најавуваат свечена академија.
– Јубилејот е важен од два аспекта. Педесет години е долг период за одржување на континуитет. Во овој период се остварени врвни резултати достојни за претставување на Македонија на меѓународен план, рече денеска на прес-конференција каратистот Венцислав Недев.
Агенцијата за млади и спорт, како што информира директорот Дарко Каевски, финансиски ќе ја помогне манифестацијата, а дава поддршка и на активностите предвидени во календарот на натпревари на домашен и меѓународен план.