Во малата сала на СЦ „Борис Трајковски” денеска е отворен 6-от меѓународен турнир во џудо „Миоки опен”, во организација на Џудо клубот Миоки од Скопје, а по повод Меѓународниот ден на џудото.
На натпреварот учествуваат џудисти во три старосни категории во вкупно 50 тежински категории. Покрај од Македонија, има екипи и од уште 12 балкански држави.
Турнирот го отвори директорот на Агенцијата за млади и спорт Марјан Спасески, кој го искажа задоволството што Градот Скопје и Република Македонија се наметнуваат на европската спортска мапа како одлични организатори и домаќини на реномирани меѓународни спортски натпреварувања.
– Особено ме радува фактот што на овој турнир ќе учествуваат и шест македиондки екипи со околу 70 натпреварувачи, што зборува дека овој спорт во нашата земја високо котира и е практикуван од многу млади луѓе низ целата држава, изјави директорот Спасески.
На почетокот на настанот беше доделена награда и на најдобрата македонска џудистка во младинска категорија, Берна Шерифовска, која воедно е и носител на стипендијата “Спортска надеж” која ја доделува Агенцијата за млади и спорт.