Македонскиот првак МЗТ Скопје Аеродром го доживеа и третиот пораз во новата сезона во АБА лигата откако попладнево загуби во рамките на 4. коло од Мега Лекс со 82:70 (8:26; 30:16; 27:15; 17:13).
На стартот од дуелот „металците“ беа подобриот тим и откако ја добија првата четвртина во вториот период имаа и највисоки +20 разлика (28:8). Но, во продолжението како да играа без одбрана и во вториот и третиот период заедно примија вкупно 57 поени. На тоа треба да се додадат и вкупно 19 грешки.
Во редовите на Мега најрасположен беше македонскиот репрезентаивец Предраг Самарџиски (поранешен играч на МЗТ Скопје), кој имаше „дабл-дабл“ учинок 22 поена и 10 скокови. Кај МЗТ Скопје Марко Љубичиќ и Марко Луковиќ со по 15 поени беа најефикасни.
На другите натпревари од 4.коло одиграни попладнево: Будуќност го совлада Задар со 78:47, а Крка беше подобра од Цедевита со 85:77. Вечерва играат: Цибона – Олимпија, а вчера Црвена Звезда го победи Тајфун со 113:66.
Колото ќе биде комплетирано со утрешните натпревари: Игокеа – Партизан и Сутјеска – Металац.