Во последен момент, Металург ја реши позицијата десен бек. Имено, денеска до 24 часот е последниот рок за пријавување нови ракометари за групната фаза на Лигата на шампионите.
Нашиот проблемот со десен бек со недели ја брануваше ракометната јавност. Нашите фанови во своите коментари и прашања покажуваа постојана грижа за таа позиција во нашиот тим. Управата на Металург вложи максимален напор да дојде до ракометар што има и искуство и ракометно знаење и не подлегна на притисокот на времето и не доведе анонимен играч колку да ја пополни празнината.
Со задоволство можеме да соопштиме дека е постигнат договор со Ренато Вугринец (Словенија), кој веќе утре ќе и се приклучи на екипата. Вугринец (37) има огромно интернационално искуство и досега настапувал за екипите на П.Л.Цеље, Магдебург, С.А.Портланд, Хамбург и Марибор Браник. Вугринец во “Автокоманда“ ќе остане една година.