Екипата на германски Кил е новиот ракометен шампион на Европа, откако во финалето го совлада Атлетико Мадрид со 26:21.
Воведниот дел ветуваше неизвесен натпревар, се до крајот на првото полувреме кога Кил успеа да се одлепи и на плус 4, меѓутоа на крајот на полувремето резултатот беше 13:10.
Во вториот дел, со добра одбрана пред се и фантастичниот Омејер на голот со 18 одбрани Кил успеа да ја задржи и да ја зголеми предноста за конечни 26:21. Ким Андерсен со 7 и Филип Јиха со 6 погодоци беа најпрецизни кај Кил, додека Лазаров кај Атлетико постигна скромни за него пет погодоци.
За капитенот на македонската репрезентација ова е втор последователен пораз во финалето на натпреварувањето по ланскиот од Барселона со 24:27.
Микел Хансен со 98 погодоци е најдобар стрелец на натпреварувањето. Кире Лазаров е втор со 97, а Златко Хорват од Загреб и Филип Јиха од Кил со по 94 постигнати погодоци се на третото на листата.
Во натпреварот за третото место одигран помеѓу Копенхаген и Фуксе Берлин победи данската екипа со 26:21.