Тренерот на женскиот македонски ракометен шампион Вардар СЦБТ, Индира Кастратовиќ смета дека нејзините избранички ќе имаат добра можност да одиграат квалитетни натпревари, во пресрет на остварувањето на високите амбиции зацртани пред почетокот на новата сезона.
– Нашата група е многу тешка. Знаеме колку се силни екипите на Будуќност и Турингер, а очекуваме Митјиланд да ја комплетира нашата група, со оглед на тоа што е голем фаворит во квалификациската група покрај Бјасен, Подравка и Раднички Крагуевац. Тука нема аутсајдери и не смее никој да се потцени. Сметам дека рамноправноста на екипите е главна одлика на оваа група. Сепак, и ние имаме квалитетен тим и големи амбиции сезонава, изјави Кастратовиќ.
Вардарки следната сезона ќе бидат дел од групата Б заедно со финалистот од овогодинешното издание на Лигата на шампионите Будуќност, како и шампионот од Бундеслигата Турингер. Третиот противник ќе биде познат по квалификациите, а најголеми шанси има Митјиланд, учесникот на „Ф4” турниот во Будимпешта и дански вицешампион.