Дерби натпреварот од Д групата во квалификациите за Светското првенство 2018 година, меѓу Италија и Шпанија заврши без победник 1:1.
На средбата одиграна синоќа во Торино, фудбалерите на двете селекции прикажаа борбена и на моменти остра игра која резултираше со дури осум жолти картони, како и два гола во мрежите на двете селекции.
Шпанците преку Витоло во 55-минута поведоа со 1:0, а на осум минути пред крајот (82) Даниеле Де Роси од пена израмни на 1:1 поставувајќи го конечниот резулат на натпреварот.
Во оваа група во која е и селекцијата на Македонија која синоќа во Скопје беше поразена од Израел со 2:1, се одигра уште еден натпревар во кој Албанија како гостин славеше победа над Лихтенштајн со 2:0.
По две одиграни кола, на табелата лидер е Албанија со максимални 6 бодови, додека Шпанија и Италија имаат по 4, Израел 3, а Македонија и Лихтенштајн се без освоен бод досега.
Во следното 3.коло кое на програмата е веќе во недела (9 октомври) ќе играат: Израел – Лихтенштајн (од 18 часот), Македонија – Италија, Албанија – Шпанија (20:45 часот).