Играчот на Сакраменто Руди Геј дополнително е повикан во составот на репрезентацијата на Соединетите Американски Држави која се подготвува за Светското кошаркарско првенство.
Големиот број повредени играчи и откажани настапи го натераа селекторот Мајк Крижевски да го повика Геј. Овој кошаркар беше дел од селекцијата на САД на СП во Турција 2010 година.
Геј изминатата сезона во НБА лигата настапувајќи за Торонто и Сакраменто имаше просек од 20 поени, 6 скокови и 2,9 асистенции.
САД кои ја бранат титулата светски првак, во првата фаза од Мундобаскетот во Шпанија (почнува на 30.август) се наоѓаат во Ц групата заедно со селекциите на Доминиканска Република, Финска, Нов Зеланд, Турција и Украина.