Репрезентативецот на Колумбија Радамел Фалкао кој во летниот преоден рок направи трансфер од Атлетико Мадрид во Монако за француските медиуми изјави дека планира во новата средина да остане подолг период.
– Не е точно дека во Монако сум само на кратко. Овој клуб го избрав поради долгорочните планови и поради тоа што сакам сериозни предизвици, изјави Фалкао.
Тој открива дека неговиот сонародник Фреди Гуарин ќе му прави друштво во новиот клуб.
– Се надевам дека Гуарин доаѓа во Монако и тоа многу ме радува. Со него бевме соиграчи во Порто каде имавме успешни настапи и верувам дека ќе биде така и во Монако, рече Фалкао.
За трансферот на Колумбиецот Монако плати 45 милиони евра на неговиот поранешен клуб, а на Фалкао ќе му исплаќа годишна плата од 12 милиони евра.