Здравствените власти во Тирана го отфрлија барањњрто на Фудбалската федерација на Албанија (ФСХФ) да дозволат продажба на билети за претстојниот квалификациски натпревар против Англија за навивачи кои примиле вакцина против коронавирус.
Фудбалските власти во допис до премиерот Еди Рама побараа дозвола стадионот во Тирана да биде исполнет со 30 отсто од вкупниот капацитет, или влез на околу 6.500 вакцинирани навивачи на натпреварот против Англија, в недела, во рамки на квалификациите за пласман на Мундијалот 2022 во Катар.
– Предлагам вакцинираните лица да имаат можност од трибините да го следат натпреварот, како бенефит од процесот на вакцинација што го извршувате како Влада. Уверен сум дека ќе го разгледате ова наше барање во интерес на албанскиот фудбал и љубовта на навивачите кон репрезентативниот црвено – црн дрес, напиша претседателот на ФЦХФ Арменд Дука во писмото до албанските власти.
Албанското Министерство за здравство, како што јавија локалните медиуми, го разгледало и го отфрлило ваквото барање поради зголемениот број новозаразени со коронавирус во земјата.