Напаѓачот на Манчестер Сити, Серхио Агуеро ќе продолжи да го носи дресот на клубот и следната сезона. Договорот на Аргентинецот истекува за една година и неодамна се зборуваше дека тој би можел да биде продаден, а интерес за него покажуваат Интер и Наполи. Сепак, агентот на играчот Хернан Регера е категоричен дека нема да се пресели од „Етихад“.
„Серхио има договор со Манчестер Сити до 2021 година и нема шанси да замине пред да истече. Ќе видиме што ќе се случи следно. Не сум разговарал со Интер и причината е многу едноставна: „Агуеро е среќен со „граѓаните“ и нема желба да го смени клубот“, објави Регера.
Агуеро ќе наполни 32 години следниот месец. Сепак, тој продолжува да покажува високо ниво на перформанси и оваа сезона има 23 голови на 30 натпревари одиграни на сите натпреварувања.